Hitt og annað.

Ég held ég sé nú loksins að skríða saman þótt ég sé alls ekki orðin góð en ég tek það bara rólega í nokkra daga ennþá og get þá vonandi farið að vera smá á ferðinni. Ég varð annars ekki mjög glöð í nótt þegar ég fór fram að fá mér heitt að drekka við hóstanum. Hverju mætti ég ??? Jú þessari risa stóru svörtu könguló ég var að hugsa um að vekja Geithafurinn og láta hann bjarga mér en svo sá ég þessa fínu glerkrukku sem ég bara skellti yfir dýrið þannig ég gat drukkið í friði. Lét svo bara Geithafurinn setja hana út í morgun því það var ekki sjens að ég myndi snerta þetta flykki !!

Við ætluðum að vera voða sniðug áðan þar sem Geithafurinn var í fríi eftir hádegið ( það var svo lítið að gera að allir fengu frí) og fara að versla inn til að losna við allt kaðrakið á morgun þegar við komum að búðinni að þá mættum við bara fólki með tómar körfur sem er frekar mikið óvenjulegt !! En við fórum inn að athuga málið og þá var verkfall. Litlar einkabúðir eru opnar en allar stærri matvörubúðir lokaðar þannig að við verðum að fara á morgun ef við ætlum að eiga eitthvað að borða um páskana þar sem það er farið að verða ansi lítið til á heimilinu þar sem allir hafa verið veikir innandyra.

Já það er fjör.....

...eða þannig ! Ég er ennþá þræl lasin er uppstoppuð af kvefi og finn hvorki lykt né bragð. Ætla rétt að vona að ég verði búin að fá bragðskynið á Sunnudaginn svo ég geti fengið mér súkkulaði...veit ekki ennþá hvort ég kaupi mér egg eða bara súkkulaði. Það fer eftir því hvað verður á boðstólnum þegar ég loksins kemst í búð. Geithafurinn er farinn í vinnuna ( en hér eru skírdagur og föstudagurinn langi ekki rauðir)  en amma gamla er lögst í flensu líka þannig að það er fjör hér í húsinu núna ! Allir meira og minna úr lagi gengnir.

Læknaheimsókn.

Það tók ekki nema þrjá tíma að fara til doksa. Það var opið frá 3 í dag og við vorum komin fyrir utan hjá honum korter yfir eitt og vorum númer 3 í röðinni. Við semsagt fórum bæði þar sem Geithafurinn er með bronkítis eina ferðina enn. Hann var að vinna í morgun en verður heima núna fram á fimmtudag. Það voru reyndar fáir að bíða eftir lækninum og liggur það í því að læknirinn sem er alltaf er í fríi og það er Egypskur læknir að leysa hann af og það eru ekki allir til í að fara til hans. En mér leist vel á hann og ég var hlustuð í bak og fyrir og fékk pensillín til að taka næstu daga. En úff hvað ég er þreytt eftir þetta enda ekki beint gaman að sitja úti í bíl í klukkutíma með bullandi hita. Held ég fari að leggja mig...ég hefði kannski átt að gera eins og gömlu hjónin sem voru fyrst í röðinni, þau steinsváfu í bílnum þar til klukkan var langt gengin í 3 þá komu þau með stírurnar í augunum inn á biðstofuna.

Hvað er í gangi !!!

Ég er búin að næla mér í þriðju flensuna síðan um jól. Verð að segja að mér finnst þetta nú orðið alveg ágætt ! Nenni ekki alveg að hanga inni í svona góðu veðri með hita, hósta og beinverki en það er víst ekki spurt að því. 

Í belg og biðu.

Er eitthvað hálf asnaleg í eins og er. Svaf illa í nótt og ákvað að leggja mig aftur þegar Geithafurinn var farinn í vinnuna og var rétt sofnuð þegar ég heyri kallað Ólöf og auðvitað hrökk ég upp. En málið er að það var enginn þarna, þar sem ég var ein á efri hæðinni og sú gamla niðri kallar mig alltaf Alí. En allavega eftir þetta að þá gat ég auðvitað ekkert sofnað aftur. Þannig að ég náttúrlega fór bara á fætur og ákvað að fara út í búð, sem var ekki góð ákvörðun !! Ég hélt ég myndi halda páskana þar....það var eins og það yrði bara ekkert opið nema í dag og svo lokað það var þvílík stappa af fólki að ég rétt henti einhverju smá í körfu og fór á kassann. En það er nú ekki eins og það sé ekkert opið sko því hér er allt opið nema á Páskadag og annan í páskum. En annars er þvílíkt gott veður og reyndar mjög gott að fá sér gönguferð í búðina en ég held að ég reyni að klára innkaup á morgun fyrir alla næstu viku því ég er ekki að nenna að vera í svona stappi sem á bara eftir að aukast á næstu dögum.

Annars er frekar skrítinn dagur þar sem það er afmælisdagurinn hennar ömmu og það er frekar skrítið að geta ekki tekið upp tólið og hringt í hana !

Jamm og jæja.

Hér er svo sannarlega vor í lofti ! Enda er allt að vakna til lífsins, skjaldbakan í næsta garði er vöknuð og ég verð að segja að ég sakna þess að hafa ekki skjaldbökurnar hér í garðinum en þær voru settar annað vegna þessa að það er búið að vera að vinna í garðinum og á eftir að gera meira. Ætla bara rétt að vona að þetta haldist eitthvað áfram.

En annars er nóg að snúast hjá mér alla vegana þar sem ég fann mér nýtt áhugamál sem tekur soldinn tíma en annars er allt við það sama. Sú gamla gerir mann gráhærðan reglulega og eins og staðan er núna má segja að ég sé í góðri æfingu að telja upp á 100 !!! Ég varð til dæmis ekki mjög glöð í gær þegar ég setti í þvottavélina og hvíti þvotturinn kom út loðinn og svartur. Þá hafði sú gamla verið að þvo stóra hunda mottu og þótt það sé búið að biðja hana um að láta þetta ekki í vélina ( er allt of stórt ) eða allavega að láta þá vélina þvo tóma á eftir að þá er það aldrei gert. Ef þetta væri hennar vél að þá væri allt í góðu og ekkert hægt að segja en hennar gaf upp öndina fyrir löngu síðan og hún ákvað að kaupa ekkert aðra heldur nota bara þessa frá efri hæðinni. Semsagt líf og fjör hér eins og venjulega.

 

.........

Ég er alveg andlaus þessa dagana ! Nenni ekki að blogga þegar ég fer á netið enda reyndar ekki mikið að gerast hér. Held að vorið sé að láta sjá sig þar það er oftast fínt veður um miðjan daginn og allt er að lifna við. Spurning hvort að maður láti loksins verða af því að reyna að gera eitthvað í þessum garði.   En ég hef bara alls ekki græna fingur og mér finnst svo leiðinlegt að vera í garðvinnu að ég reyni að finna mér allt annað til að gera. En það gengur ekki kannski ekki endalaust.

Laugardagur....

Er skelfilega andlaus þessa dagana. Þegar ég hef ætlað að blogga að þá virkar ekki netið og svo þegar það virkar að þá er ég andlaus. Enda ekki mikið að gerast þessa dagana, dagurinn í dag fór í búðarferðir og heimsókn til ömmu og afa. Amman sú er ekki mjög hress þessa dagana enda búin að vera lasin undanfarna mánuði. Hin amman sú á neðri hæðinni er með betra móti eins og er...vonandi að það haldist. En það er reyndar kannski ekki skrítið að eitthvað fari að gefa sig í fólki sem er komið hátt á níræðisaldur.

Nú er það snúið.

Hlutirnir eru ekki nógu góðir hér eins og er. Það er vesen með gömlu konuna og ef satt á að segja vitum við ekki alveg hvernig við getum snúið okkur í þessu. Geitahafurinn hringdi í frænku sína til að fá hennar álit og hún er hjá þeirri gömlu núna. En mér leist alls ekki á þá gömlu um hádegið þegar hún kallaði í mig til að vita hvað ég væri að gera á fótum, því þá var hún alveg á því að það væri mið nótt. Hún trúði mér ekki nærri strax að það væri hádegi, því að hún var að hugsa um að fara að sofa. En hún er semsagt farin að rugla meira og meira með degi hverjum þannig að þetta er alls ekki nógu gott ástand eins og er.

Pifffff.

Er að glápa á Doktor House á Ítölsku og get ekki sagt að mér finnist það mjög spennandi...kann engan vegin við að horfa á talsettar seríur. Er nefnilega ekki með sky afruglarann hann er í stofunni eins og er og það eru þrír kallar í stofunni að horfa á tuðruspark.

Annars er ekki mikið að gerast það er búið að vera þvílíkt gott veður síðustu daga en í dag rok og rigning. Það er allt að lifna við og froskarnir eru farnir að vera á vappi. Ég mætti einum stórum í hundagöngunni áðan. Stoppaði og tók hann upp og var að hugsa um að fara með hann heim en hætti við og sleppti honum aftur. Ætla samt með mynda vélina með mér á morgun þar sem mig langar í froskamynd, ég hlýt að rekast á fleiri á næstunni.